بہت درویش لڑکی ہے
کسی بھی بات کا اس کو برا کچھ بھی نہیں لگتا
نا ماتھے پر کوئی سلوٹ
نا آنکھوں میں کوئی غصہ
بہت ہی پیار سے ہر ایک سے وہ بات کرتی ہے
ہر اک کی بے رخی کو سہہ کے بھی خاموش رہتی ہے
وہ دل ہی دل میں جانے کتنی باتیں سوچتی تو ہے
مگر ان کو کبھی الفاظ کی صورت نہیں دیتی
فقط دل میں ہی رکھتی ہے
کسی سے کچھ نہیں کہتی
میں جب بھی پوچھتا ہوں کس لیے خاموش رہتی ہو
تو کہتی ہے کہ مجھ میں ہمت ہی نہیں ہے کہ
کسی سے بات کر پاؤں
مجھے خاموش رہنے دو
یہ دنیا یوں بھی لفظوں کی کوئی پرواہ نہیں کرتی
سنی کو ان سنی کرنا زمانے کی روایت ہے
کسی کو خود سے حالِ دل سنایا بھی تو کیا حاصل
جسے احساس ہوتا ہے
وہ آنکھیں پڑھ کے دل کی ساری باتیں جان لیتا ہے
مجھے خاموش رہنے دو
زمانہ بات کرنے کو اداکاری سمجھتا ہے
سو میں الفاظ کی توقیر کو ضائع نہیں کرتی
مجھے خاموش رہنا ہے
فقط خاموش رہنا ہے کہ مجھ کو یہ اداکاری کسی صورت نہیں آتی
وہ جب خاموش ہوتی ہے
تو اس کی جھیل سی آنکھوں سے دو موتی چھلکتے ہیں
جو مجھ سے بات کرتے ہیں
تو پھر میں اس کے سب الفاظ کو آواز دیتا ہوں
وہ دل میں سوچتی ہے اور میں وہ بات کرتا ہوں
میں اپنی خشک آنکھیں اس کی آنکھوں سے ملاتا ہوں
اور اس کے اشک سارے اپنی آنکھوں پر سجاتا ہوں
پھر اس کا ہاتھ ہاتھوں میں لیے ویران راہوں پر
میں اس کے ساتھ چلتا ہوں
کئی قصے سناتا ہوں
اسے اتنا ہنساتا ہوں
کہ ہنستے ہنستے اپنا سر مرے سینے پہ رکھتی ہے
تو ہر غم بھول جاتی ہے.❤❤
No comments:
Post a Comment