*🌷اپنے بھائی کی ہر حال میں مدد کریں🌷*
✍ حضرت انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا:
{{أنصر أخاك ظالما أو مظلوما}}
*"اپنے بھائی کی مدد کرو، خواہ وہ ظالم ہو یا مظلوم"*
ایک آدمی نے عرض کیا: اے اللہ کے رسول صلی اللہ علیہ وسلم!
{أنصره إذا كان مظلوما، أفرايت إذا كان ظالما كيف أنصره}
*"جب وہ مظلوم ہوگا تب تو میں اس کی مدد کروں گا، لیکن جب وہ ظالم ہوگا تو آپ بتائیں کہ میں اس کی مدد کیسے کروں؟*
آپ صلی اللہ علیہ وسلم نے ارشاد فرمایا:
{{تحجزه أو تمنعه من الظلم فإن ذلك نصره}}
*"تم اس کو ظلم سے روکو -یا منع کرو- یہی اس کی مدد کرنا ہے۔"*
(صحیح بخاری:6952)
*نوٹ:*
#مظلوم کی مدد کرنا ضروری ہے، وگرنہ پورا معاشرہ گناہ گار ٹھہرے گا۔
#جیسے مظلوم کی مدد کرنا شریعت میں مطلوب ہے ویسے ہی ظالم کی مدد کرنا بھی شریعت میں مطلوب ہے۔
#مظلوم کی مدد اس طرح ہوگی کہ اس کو ظالم کے ظلم وستم سے بچایا جائے، اس کو اس کا جائز حق دلایا جائے اور اس کے ساتھ عدل وانصاف کا معاملہ کرایا جائے۔
#ظالم کی مدد اس کو مظلوم پر ظلم وستم کرنے سے باز رکھ کر کی جائےگی۔
#ظالم کو ظلم سے روکنا اس کی مدد بایں طور ہوگی کہ وہ ایک بڑے گناہ کے ارتکاب سے بچ جائےگا، شریعت میں اس گناہ پر جو سخت وعید آئی ہے اس کا مستحق بننے سے بچ جائےگا، زندگی پر مرتب ہونے والے اس گناہ کے برے اثرات سے بچ جائےگا، دنیا اور آخرت میں اس گناہ کی مقرر شدہ سزائوں سے بچ جائےگا، مظلوم کی بد دعائوں سے بچ جائےگا، قیامت کے دن کی تاریکیوں سے اور اس دن کی مفلسی ودیوالیہ پن سے بچ جائےگا۔
#انسانیت اور بھائی چارگی کا تقاضا ہے کہ جہاں تک ہو سکے مظلوم کی تن من دھن سے اور اثر ورسوخ کے ذریعے ہر ممکن مدد کی جائے۔
#یہ بھی ایمان ہی کا تقاضا ہے کہ ظالم کو حسب استطاعت ظلم وزیادتی سے روکا جائے:
اگر استطاعت ہو تو ہاتھ سے یعنی طاقت وقوت کے زور پر روکنا چاہئے، نہیں تو زبان سے منع کرنا چاہئے اور قلم سے اس کے خلاف آواز اٹھانا چاہئے، اور اگر یہ بھی نہیں تو کم از کم اس کے ظالمانہ عمل کو دل سے ضرور برا جاننا چاہئے۔
#اسلام ایک دوسرے کے ساتھ تعاون اور خیرخواہی کا دین ہے۔
#اللہ اپنے اس بندے کی ضرور مدد کرتا ہے جو اپنے بھائی کی مدد میں لگا رہتا ہے۔
#اے اللہ! ملک شام کے مسلمانوں کی مدد فرما، اور دیگر مسلمانان عالم کو بھی بروقت ان کی مادی ومعنوی دونوں اعتبار سے امداد کرنے کی توفیق عطا فرما۔
*آپ کا بھائی:*
افتخار عالم مدنی
اسلامک گائڈینس سنٹر
جبیل سعودی عرب
